Fish Venkat: సినిమా ప్రేక్షకులను తన ప్రత్యేకమైన కామెడీ టైమింగ్తో, విలన్ రోల్లోనూ నవ్వులు పంచే నటనతో మెప్పించిన ప్రముఖ క్యారెక్టర్ ఆర్టిస్ట్ ఫిష్ వెంకట్ (వయసు 53) ఇకలేరు. గత కొంతకాలంగా అనారోగ్యంతో బాధపడుతున్న ఆయన, జులై 18న రాత్రి హైదరాబాద్లోని చందానగర్లోని ఓ ప్రైవేట్ ఆసుపత్రిలో తుదిశ్వాస విడిచారు. ఈ వార్తతో సినీ ఇండస్ట్రీలో విషాద ఛాయలు అలుముకున్నాయి. కానీ అతనిపై కనీస అనుబంధం కనబరిచే ఒక్క సినీ ప్రముఖుడూ ముందుకు రాకపోవడం పెద్ద చర్చగా మారింది.
ఫిష్ వెంకట్ తొలి సినిమా పవన్ కల్యాణ్ ‘ఖుషి’ (2001) కాగా, 2002లో ఎన్టీఆర్ నటించిన ‘ఆది’ చిత్రంలోని “తొడకొట్టు చిన్నా..” అనే డైలాగ్తో అతనికి పాపులారిటీ వచ్చింది. అప్పటి నుంచి దిల్, బన్నీ, అత్తారింటికి దారేది, డీజే టిల్లు, కింగ్, దరువు, సుప్రీమ్, మిరపకాయ్ వంటి అనేక హిట్ చిత్రాల్లో నటించారు. చిన్న చిన్న పాత్రల్లోనూ తన మార్క్ కామెడీ, మేనరిజంతో ప్రేక్షకుల హృదయాల్లో ప్రత్యేక స్థానం సంపాదించారు. దర్శకుడు వీవీ వినాయక్ తన ప్రతీ సినిమాలో ఫిష్ వెంకట్ను ఒక రౌడీ గ్యాంగ్ మెంబర్గా కచ్చితంగా తీసుకునేవారు.
Fish Venkat: కెరీర్ ప్రారంభంలో రోజుకు రూ. 2,000..?
కెరీర్ మోస్తరుగా నడుస్తుండగానే షుగర్, కిడ్నీ సమస్యలు, కాలుకు ఇన్ఫెక్షన్ వంటి అనారోగ్య సమస్యలు తలెత్తాయి. నాలుగేళ్ల క్రితం శస్త్రచికిత్స తర్వాత కొంతవరకు కోలుకున్నా, సినిమాల్లో అవకాశాలు తగ్గిపోయాయి. ఇటీవల రెండు కిడ్నీలు పూర్తిగా ఫెయిల్ కావడంతో బోడుప్పల్ ఆసుపత్రిలో డయాలసిస్ చేయాల్సి వచ్చింది. ఈ సమయంలో కొందరు ప్రముఖులు అండగా నిలిచినప్పటికీ, కిడ్నీ దాత దొరకకపోవడం ప్రధాన సమస్యగా మారింది. చివరకు పరిస్థితి విషమించి మృతి చెందారు.
వెంకట్ డిమాండ్ ఉన్న నటుడే అయినా.. రెమ్యూనరేషన్ మాత్రం తక్కువగానే ఉండేది. కెరీర్ ప్రారంభంలో రోజుకు రూ. 2,000, తరువాత ఒక్కో సినిమాకు రూ. 30,000 వరకు తీసుకునేవారని ఆయన సన్నిహితులు చెబుతున్నారు. కుటుంబ అవసరాలకు ఇది సరిపోయినా, శస్త్రచికిత్సలు, డయాలసిస్ వంటి ఖర్చులకు ఇది ఎక్కడా చాలు కాదు. చివరి రోజుల్లో ఆరోగ్యమే కాదు.. ఆర్థికంగా కూడా ఇబ్బంది పడాల్సి వచ్చింది.
వెంకట్ భార్య స్పందిస్తూ – “ఆపరేషన్ తర్వాత మద్యం, ధూమపానం మానేయమన్నాం. వినలేదు. కొంతమంది స్నేహితులే వచ్చి మళ్లీ అలవాటు పెట్టించారు. చివరకు ఆసుపత్రిలో ఉన్నా, ఒక్క సినీ ప్రముఖుడు చూసేందుకు రాలేదు. కుటుంబమే ఒంటరిగా పోరాడింది” అంటూ కన్నీళ్లు పెట్టుకున్నారు.
వందల సినిమాల్లో నటించిన కళాకారుడు, ప్రేక్షకులను నవ్వించిన నటుడు.. చివరికి ఆసుపత్రి బెడ్ మీద ఒంటరిగా పోరాడుతూ, ఆర్థిక సహాయం కోసం ఎదురు చూస్తూ చనిపోవడం ఎంత వేదనకరం! ఫిష్ వెంకట్కు తగిన గుర్తింపు ఆయన బ్రతికున్నప్పుడే దక్కాల్సింది. అయినా ఆయన నటన, డైలాగ్ డెలివరీ, ప్రత్యేకమైన శైలి సినిమాల ద్వారా చిరస్థాయిగా మన మనసుల్లో ఉండిపోతుంది.