AP POLITICS: దేశ రాజకీయాల్లో ఇప్పుడు ‘డిలిమిటేషన్’ (నియోజకవర్గాల పునర్విభజన) అంశం ఒక హాట్ టాపిక్‌గా మారింది. ముఖ్యంగా దక్షిణాది రాష్ట్రాల్లో దీనిపై తీవ్ర ఉత్కంఠ నెలకొంది. ఈ తరుణంలో ఆంధ్రప్రదేశ్ ముఖ్యమంత్రి నారా చంద్రబాబు నాయుడు చేసిన వ్యాఖ్యలు జాతీయ స్థాయిలో పెను సంచలనంగా మారాయి. కేవలం జనాభా ప్రాతిపదికన నియోజకవర్గాల విభజన చేపడితే, అది దక్షిణాది రాష్ట్రాల గొంతు నొక్కడమే అవుతుందంటూ ఆయన వేసిన పొలిటికల్ బాంబ్ ఇప్పుడు దేశవ్యాప్తంగా చర్చనీయాంశమైంది.

నిజానికి, కేంద్ర ప్రభుత్వ పిలుపును అందుకుని గత కొన్ని దశాబ్దాలుగా జనాభా నియంత్రణలో దక్షిణాది రాష్ట్రాలు అద్భుతమైన ప్రగతిని సాధించాయి. కుటుంబ నియంత్రణ పాటించి దేశాభివృద్ధికి సహకరించాయి. కానీ, ఇప్పుడు అదే జనాభా లెక్కల ఆధారంగా పార్లమెంట్, అసెంబ్లీ సీట్లను కేటాయిస్తే.. జనాభాను నియంత్రించని ఉత్తరాది రాష్ట్రాలకు ఎక్కువ సీట్లు వచ్చి, రూల్స్ పాటించిన దక్షిణాది రాష్ట్రాలకు సీట్లు తగ్గిపోయే ప్రమాదం ఉంది. దీన్నే చంద్రబాబు తీవ్రంగా తప్పుబట్టారు. అభివృద్ధిని చూసి సీట్లు పెంచాలే కానీ, జనాభాను చూసి కాదనే సరికొత్త సమీకరణాన్ని ఆయన తెరపైకి తెచ్చారు.

AP POLITICS: ఏపీ రాజకీయాలకే పరిమితం కాలేదు..

ఆంధ్రప్రదేశ్‌లో ప్రస్తుతం ఉన్న అసెంబ్లీ, పార్లమెంట్ స్థానాలను కనీసం 50 శాతం పెంచితేనే రాష్ట్రానికి న్యాయం జరుగుతుందని చంద్రబాబు వ్యాఖ్యానించారు. అయితే, ఇక్కడే ఆయన ఒక ఊహించని మాస్టర్ స్ట్రోక్ ఇచ్చారు. పెరిగే ఆ అదనపు నియోజకవర్గాలను పూర్తిగా మహిళలకే కేటాయించేలా చట్టం చేయాలని ప్రతిపాదించారు. దీనివల్ల అటు నియోజకవర్గాల సంఖ్య పెరగడంతో పాటు, మహిళా సాధికారతకు ఏపీ వేదికగా మారుతుందని ఆయన స్పష్టం చేశారు. అలాగే, చట్టసభల్లో మహిళలకు 33 శాతం రిజర్వేషన్‌ను తక్షణమే అమలు చేయాలని డిమాండ్ చేశారు.

చంద్రబాబు చేసిన ఈ వ్యాఖ్యలు కేవలం ఏపీ రాజకీయాలకే పరిమితం కాలేదు. జాతీయ రాజకీయాల్లో చక్రం తిప్పిన అనుభవం ఉన్న బాబు.. దక్షిణాది హక్కుల పేరుతో లేవనెత్తిన ఈ పాయింట్ ఇప్పుడు కేంద్ర పెద్దల ఆలోచనలను సైతం మార్చేలా ఉంది. జనాభా నియంత్రణ పాటించినందుకు దక్షిణాదికి శిక్ష వేస్తారా? లేక చంద్రబాబు ప్రతిపాదించినట్లు సరికొత్త విధానాన్ని అవలంబిస్తారా? అనేది ఇప్పుడు మిలియన్ డాలర్ల ప్రశ్న. ఏది ఏమైనా, డిలిమిటేషన్‌పై బాబు విసిరిన ఈ పొలిటికల్ బాంబ్ రాబోయే రోజుల్లో దేశ రాజకీయాల గమనాన్ని మార్చడం ఖాయంగా కనిపిస్తోంది.