Tholi Ekadashi: హిందువులు ఎన్నో పండుగలను జరుపుకుంటారు ఇలా హిందువులు జరుపుకునే పండుగలలో తొలి ఏకాదశి ఒకటి. ఈ ఏకాదశిని కొన్ని ప్రాంతాలలో విత్తనాల ఏకాదశి అని కూడా పిలుస్తారు. ఈ ఏకాదశికి రైతులందరూ కూడా పొలాలలో విత్తనాలు విత్తుకుంటారు కనుక దీనిని విత్తనాల ఏకాదశి అని పిలుస్తారు. ఈ రోజున పెద్ద ఎత్తున రైతులు తమ ఎద్దులను అలాగే వ్యవసాయ సామాగ్రికి అలంకరించి చాలా చురుగ్గా వ్యవసాయ పనులను ప్రారంభిస్తారు. అందుకే రైతులకు ఈ ఏకాదశి ఎంతో ప్రత్యేకమైనదిగా భావిస్తారు..
ఆషాడ మాసంలో పౌర్ణమికి ముందు వచ్చే ఏకాదశిని తొలి ఏకాదశి అని పిలుస్తారు. అయితే సంవత్సరంలో మనకు నెలకు రెండు ఏకాదశలు చొప్పున 24 ఏకాదశలు వస్తాయి. ఇలా కృష్ణపక్షంలో ఒక ఏకాదశి శుక్లపక్షంలో ఒక ఏకాదశి వస్తుంది. 24 ఏకాదశిలలో ఆశాడ శుక్ల ఏకాదశిని తొలి ఏకాదశిగా పరిగణిస్తారు. పురాణాల ప్రకారం ఈ ఏకాదశి రోజు విష్ణుమూర్తి యోగ నిద్రలోకి వెళ్తారని భావిస్తారు. ఇలా స్వామివారి యోగ నిద్రలోకి వెళ్లడం వల్ల ఈ ఏకాదశిని శయన ఏకాదశి అని కూడా పిలుస్తారు.
Tholi Ekadashi:
ఈ ఏకాదశి రోజు ఉపవాసంతో శ్రీమహావిష్ణువును పూజించడం వల్ల ఎన్నో శుభ ఫలితాలను పొందడమే కాకుండా విష్ణుమూర్తి అనుగ్రహానికి కూడా పాత్రులవుతారు.ఇలా ఏకాదశి రోజు మొత్తం ఉపవాసంతో ఉండి మహావిష్ణువును పూజిస్తూ ద్వాదశి రోజు విష్ణుమూర్తికి ప్రత్యేక పూజలు చేసిన అనంతరం తీర్థప్రసాదాలను తీసుకోవడం వల్ల జన్మజన్మల పాపాలు తొలగిపోతాయని భావిస్తారు.ఈ విధంగా తొలి ఏకాదశి రోజు యోగ నిద్రలోకి వెళ్లినటువంటి మహావిష్ణువు నాలుగు నెలల తర్వాత అంటే కార్తీక శుద్ధ ఏకాదశి రోజు మేల్కొంటారని పురాణాలు చెబుతున్నాయి. ఇక ఏకాదశి రోజు పెద్ద ఎత్తున విష్ణు ఆలయాలలో ప్రత్యేక పూజలు నిర్వహిస్తూ ఉంటారు.
