V. N. Aditya: టాలీవుడ్ సీనియర్ దర్శకులు వీఎన్ ఆదిత్య కు గౌరవ డాక్టరేట్

V. N. Aditya: తెలుగు చిత్ర పరిశ్రమలో దర్శకుడిగా మంచి పేరు సంపాదించుకున్న వీఎన్ ఆదిత్య ను అమెరికా జార్జ్ వాషింగ్టన్ యూనివర్శిటీ ఆఫ్ పీస్ గౌరవ డాక్టరేట్ తో సత్కరించారు. వీఎన్ ఆదిత్య తెలుగులో “మనసంతా నువ్వే”, చిత్రం ద్వారా దర్శకుడిగా పరిచయం అయ్యారు. మొదటి చిత్రంతోనే మంచి పేరు తెచ్చుకున్నారు. అగ్ర నిర్మాత ఎమ్ ఎస్ రాజు ఈ చిత్రాన్ని నిర్మించగా ఉదయ్ కిరణ్, రీమా సేన్ జంటగా నటించారు. ఆ తర్వాత అక్కినేని నాగార్జున, ఆర్తీ అగర్వాల్, శ్రీయా శరణ్ లతో “నేనున్నాను” చిత్రాన్ని రూపొందించారు.

ఈ మూవీ కూడా బ్లాక్ బస్టర్ గా నిలిచింది. దాంతో ఆయనకు టాలీవుడ్ లో దర్శకుడిగా ఓ ప్రత్యేక స్థానాన్ని సంపాదించుకున్నారు. దాదాపు పాతికేళ్లుగా సినీ పరిశ్రమలో తన ప్రస్థానాన్ని సాగిస్తున్న వీఎన్ ఆదిత్యకు అమెరికాలోని జార్జ్ వాషింగ్టన్ యూనివర్శిటీ ఆఫ్ పీస్ నుంచి గౌరవ డాక్టరేట్ దక్కింది. బెంగళూర్ లో జరిగిన అంతర్జాతీయ పీస్ కాన్ఫరెన్స్ లో అమెరికా జార్జ్ వాషింగ్టన్ యూనివర్శిటీ ఆఫ్ పీస్ వివిధ రంగాలలోని ప్రముఖులకి గౌరవ డాక్టరేట్ లను ప్రదానం చేసింది. అందులో సినిమా రంగం నుండి దర్శకుడు వీఎన్ ఆదిత్య డాక్టరేట్ అందుకున్నారు.

V. N. Aditya: ఈ డాక్టరేట్ గౌరవాన్ని మా అమ్మగారికి అంకితం ఇస్తున్నా. 

ఈ కార్యక్రమంలో ముఖ్య అతిథిగా నీతి ఆయోగ్ ఐఈఎస్ సలహాదారు శివప్ప, సెక్రటరీ జనరల్ డాక్టర్ శ్రీనివాస్ ఏలూరి, జార్జ్ వాషింగ్టన్ యూనివర్శిటీ ఆఫ్ పీస్ డైరెక్టర్ Mr నీలమణి, నేషనల్ SC & ST కమిషన్ సభ్యుడు దినేష్ గురూజీ అతిథులుగా పాల్గొన్నారు. ఈ సందర్భంగా డైరెక్టర్ వీఎన్ ఆదిత్య మాట్లాడుతూ – ఈ డాక్టరేట్ గౌరవాన్ని మా అమ్మగారికి అంకితం ఇస్తున్నా. నేను సినీ రంగంలో కాకుండా విద్యారంగంలో ఉన్నతస్థాయిలో ఉండాలని అమ్మ కోరుకుంది. నేను ఇష్టపడిన సినిమా రంగంలో డాక్టరేట్ పొందడం నాకే కాదు అమ్మకు కూడా సంతోషాన్ని ఇచ్చే విషయం. నాకు గౌరవ డాక్టరేట్ అందించిన అమెరికా జార్జ్ వాషింగ్టన్ యూనివర్శిటీ ఆఫ్ పీస్ వారికి కృతజ్ఞతలు చెబుతున్నా. అన్నారు. ఈ సందర్భంగా ఆయనకు చిత్ర పరిశ్రమ నుంచి పలువురు శుభాకాంక్షలు చెబుతున్నారు.