హైకోర్టు న్యాయమూర్తి జస్టిస్ టి. మాధవి దేవి నేతృత్వంలో ఈ ముందస్తు బెయిల్ పిటిషన్ విచారణకు వచ్చిన తరుణంలో, కొన్ని రాజకీయ అనుబంధ ఐటీ సెల్స్ బరితెగించాయి. భగీరథ్‌కు అనుకూలంగా తీర్పు ఇస్తే.. దానికి ప్రతిఫలంగా జడ్జి భర్తకు ఉన్నతమైన బార్ కౌన్సిల్ చైర్మన్ పదవి దక్కుతుందంటూ సోషల్ మీడియా వేదికగా నీచమైన ప్రచారానికి తెరలేపారు. న్యాయమూర్తి వ్యక్తిత్వాన్ని, నిష్పాక్షికతను శంకిస్తూ జరిగిన ఈ దుష్ప్రచారంపై స్వయంగా సదరు జడ్జి కోర్టులోనే తీవ్ర ఆవేదన వ్యక్తం చేయడం పరిస్థితి తీవ్రతను స్పష్టం చేస్తోంది.

Bandi Bhagirath POCSO Case Update:సీపీ శ్వేత నేతృత్వంలోని ప్రత్యేక దర్యాప్తు

ఈ ఉదంతంపై తెలంగాణ న్యాయమూర్తుల సంఘం అత్యంత తీవ్రంగా స్పందించింది. న్యాయవ్యవస్థపై నమ్మకాన్ని దెబ్బతీసేలా, తీర్పులను ప్రభావితం చేసేలా సాగుతున్న ఈ డిజిటల్ దాడిని తీవ్రంగా ఖండిస్తూ, బాధ్యులపై కఠిన చర్యలు తీసుకోవాలని డిమాండ్ చేసింది. న్యాయ వర్గాల నుంచి వ్యక్తమైన ఈ నిరసనతో ప్రభుత్వం తక్షణమే అప్రమత్తమైంది. న్యాయవ్యవస్థ ప్రతిష్టను కాపాడేందుకు మరియు ఈ కుట్ర వెనుక ఉన్న అసలు సూత్రధారులను పట్టుకునేందుకు అత్యున్నత స్థాయి దర్యాప్తునకు ఆదేశించింది.

ఈ డిజిటల్ నెట్‌వర్క్ గుట్టురట్టు చేసే బాధ్యతను జాయింట్‌ సీపీ శ్వేత నేతృత్వంలోని ప్రత్యేక దర్యాప్తు బృందానికి (SIT) ప్రభుత్వం అప్పగించింది. రంగంలోకి దిగిన సిట్ అధికారులు ఇప్పటికే ఈ వ్యవహారంలో కీలక పాత్ర పోషించిన దామోదర్ అనే ప్రధాన నిందితుడిని అదుపులోకి తీసుకున్నారు. కేవలం పోస్టులు షేర్ చేసిన వారిపైనే కాకుండా, ఈ తప్పుడు ప్రచారాన్ని వెనుక ఉండి నడిపించిన అసలు ఐటీ సెల్స్ మూలాలను వెలికితీసేందుకు సిట్ లోతైన విచారణ జరుపుతోంది. ఈ దర్యాప్తులో ఇంకెలాంటి సంచలన నిజాలు బయటకు వస్తాయోనన్న ఉత్కంఠ ఇప్పుడు సర్వత్రా నెలకొంది.