Devara- Part 1: “దేవర” చిత్రంపై కొరటాల, రాజమౌళి ప్రభావం..?

Devara- Part 1: ‘దేవర’ చిత్రంపై కొరటాల, రాజమౌళి ప్రభావం ఉంటుందా..? అంటే, గత కొన్ని రోజులుగా అవుననే మాట ఫిల్మ్ నగర్ సర్కిల్స్ లో వినిపిస్తోంది. దీనికి రెండు బలమైన కారణాలున్నాయి. ‘ఆచార్య’ చిత్రం కంటే ముందు వరకు దర్శకుడు కొరటాల శివ తీసిన సినిమాలన్నీ బాక్సాఫీస్ వద్ద భారీ కమర్షియల్ సక్సెస్‌ని అందుకున్నాయి. హీరోలకి భారీ సక్సెస్, నిర్మాతకి అనుకున్నదానికంటే రెట్టింపు లాభాలు తెచ్చిపెట్టారు.

ప్రభాస్‌తో ‘మిర్చి’ మహేశ్ బాబుతో ‘శ్రీమంతుడు’, ‘భరత్ అనే నేను’, ఎన్‌టీఆర్‌తో ‘జనతా గ్యారేజ్’ కొరటాల దర్శకత్వంలో తెరకెక్కిన సినిమాలు. వీటి సక్సెస్ రేంజ్ ఏంటో చూసిన మెగాస్టార్ చిరంజీవి చరణ్‌తో సినిమా చేయాలని వెళ్ళిన కొరటాలకి నాతో తీయోచ్చుగా అని ఆఫర్ ఇచ్చారు. దాంతో ‘ఆచార్య’ మొదలైంది. అనూహ్యంగా ఇందులో మహేశ్ బాబు కూడా ఓ పాత్ర చేస్తున్నారని ప్రచారం జరిగింది. కానీ, కొరటాల అనుకున్నట్టుగా చరణ్ ఇందులో భాగం అయ్యారు.

 

Devara- Part 1: ఈ సినిమాపై కొంత నెగిటివ్ టాక్..

మెగాస్టార్, మెగా పవర్ స్టార్, కొరటాల కాంబో అనగానే ఓ భారీ పాన్ ఇండియన్ సినిమాకి వచ్చినంత హైప్ వచ్చింది. కానీ, కారణాలేవైనప్పటికీ ‘ఆచార్య’ బాక్సాఫీస్ వద్ద భారీ డిజాస్టర్‌గా నిలిచింది. ఇక ఈ సినిమా తర్వాత మళ్ళీ కొరటాల.. ఎన్‌టీఆర్, జాన్వీ కపూర్ జంటగా ‘దేవర’ చిత్రాన్ని రెండు భాగాలుగా రూపొందిస్తున్నారు. అనిరుధ్ సంగీత దర్శకుడు. నంద‌మూరి క‌ళ్యాణ్ రామ్ స‌మ‌ర్ప‌ణ‌లో ఎన్టీఆర్ ఆర్ట్స్, యువసుధ ఆర్ట్స్ బ్యానర్‌లపై మిక్కిలినేని సుధాకర్, కొసరాజు హరికృష్ణ, నందమూరి కళ్యాణ్ రామ్ నిర్మిస్తున్నారు.

ఈ నెల 27న భారీ స్థాయిలో ‘దేవర’ పార్ట్ 1 రిలీజ్ కాబోతుంది. కాగా, ఈ సినిమాపై కొంత నెగిటివ్ టాక్ కూడా ప్రచారం అవుతోంది. రాజమౌళి దర్శకత్వంలో హిట్ కొట్టిన ఏ హీరోకైనా ఆ తర్వాత సినిమాతో ఫ్లాప్ మోయాల్సి వస్తుందని, అలాగే కొరటాల గత చిత్రం తాలూకా ప్రభావం ‘దేవర’పై కూడా ఉందని. మొదటి పాయింట్ కి చాలామంది న్యూట్రల్‌గా ఉన్నప్పటికీ రెండవ పాయింట్ కి మాత్రం ఎన్‌టీఆర్ అభిమానులు సోషల్ మీడియాలో మండిపడుతున్నారు. చూడాలి మరి అతి త్వరలో ప్రేక్షకుల ముందుకు రాబోతున్న ‘దేవర’ ఎలాంటి విజయాన్ని అందుకుంటుందో. అన్నట్టు ఈ సినిమా ప్రీ రిలీజ్ ఈవెంట్ అభిమానుల తాకిడి తట్టుకోలేక రద్దైన సంగతి తెలిసిందే. దీనికి సంబంధించి తారక్ ఓ వీడియో రిలీజ్ చేయగా అది సోషల్ మీడియాలో వైరల్ అవుతోంది.