HHVM: పవన్ కళ్యాణ్ ప్రధాన పాత్రలో రూపొందిన “హరి హర వీరమల్లు” చిత్రం భారీ అంచనాల మధ్య నేడు థియేటర్లలో విడుదలైంది. అయితే, నిన్నటి ప్రీమియర్ షోల నుంచే ఈ సినిమాకు నెగటివ్ టాక్ వ్యాపించడంతో, అభిమానుల్లో తీవ్ర నిరాశ నెలకొంది. సినిమా కథాపరిశ్రమ పరంగా ఓ స్థాయిలో ఉన్నా, దారుణమైన VFX గ్రాఫిక్స్ ఈ సినిమాకు ప్రధాన అవరోధంగా మారాయి. ప్రేక్షకుల్లో సైతం ఇది తీవ్ర అసహనాన్ని రేపుతోంది.

పవన్ కళ్యాణ్ చిత్రాన్ని చాలా కాలం తర్వాత పెద్ద తెరపై చూడగలమనే ఆశతో థియేటర్‌కు వచ్చిన అభిమానులకు ఈ సినిమా నిరాశే మిగిల్చింది. ఈ రోజుల్లో చిన్న చిన్న సినిమాలు కూడా మెరుగైన గ్రాఫిక్స్‌తో వస్తుండగా, రూ. 250 కోట్ల బడ్జెట్‌తో తెరకెక్కించిన సినిమా ఇలా ఉండడం తీవ్ర విమర్శలకు దారితీసింది. అనేక మంది అభిప్రాయపడుతున్నట్లు, ఈ స్థాయిలోని బడ్జెట్ సినిమాకు కనీస ప్రమాణాలకు సరిపడే విజువల్స్ లేకపోవడం దారుణం అని చెబుతున్నారు.

ఈ నెగటివ్ రివ్యూల ప్రభావం టికెట్ అమ్మకాలపై గణనీయంగా కనిపించింది. బుక్‌మైషో లాంటి ప్రముఖ టికెట్ బుకింగ్ యాప్‌లో, సినిమా మొదటి రోజున గంటకు 20 వేల టికెట్లు కూడా అమ్ముడవ్వలేదు. ఉదయం 10 గంటల సమయంలో గంటకు 18 వేల టికెట్లు విక్రయమైనప్పటికీ, తరువాత ఆ గణాంకాలు క్రమంగా తగ్గుతూ ఇప్పుడు గంటకు 9 వేల టికెట్లకు కూడా పడిపోయాయి. ఇటీవల విడుదలైన ధనుష్ “కుబేర” తొలి రోజు కలెక్షన్ల కన్నా తక్కువ వసూళ్లు సాధించడం సినీ వర్గాల్లో చర్చనీయాంశంగా మారింది.

HHVM: తొలి రోజే ఫ్లాప్ టాక్‌ను మూటగట్టుకున్న సినిమా

ఇలాంటి స్థాయిలో తొలి రోజే ఫ్లాప్ టాక్‌ను మూటగట్టుకున్న సినిమాకు, సాయంత్రం సక్సెస్ మీట్ నిర్వహించారు.. ఈ కార్యక్రమానికి పవన్ కళ్యాణ్ స్వయంగా హాజరయ్యారు. సాధారణంగా పవన్ తన సినిమాల ప్రచారంలో పాల్గొనడం అరుదే. కానీ ఈ సినిమా విషయంలో ఆయన స్వయంగా ప్రమోషన్ చేయడం చూసి, అభిమానులు కొంత ఆలోచనలో పడ్డారు.

అభిమానులు భావిస్తున్న దాని ప్రకారం, పవన్ కళ్యాణ్ ఒక మంచి సినిమాకు ప్రచారం చేస్తే మరింత ఆనందంగా ఉండేదని, కానీ ఫ్లాప్ సినిమా విషయంలో ‘సూపర్ హిట్, బాగుంది’ అనే ప్రచారం చేయడం ఆయన స్థాయికి తగదని అనేక మంది అభిప్రాయపడుతున్నారు. మొత్తానికి, భారీ అంచనాలను తలకిందులు చేసిన “హరి హర వీరమల్లు” భవితవ్యం ఏదీ అన్నదానిపై సినీ వర్గాల్లో ఆసక్తికర చర్చ కొనసాగుతోంది.