SSMB 29 : టాలీవుడ్ సూపర్ స్టార్ మహేష్ బాబు ఈరోజు తన 50వ పుట్టినరోజును జరుపుకుంటున్నారు. ఈ పుట్టినరోజును పురస్కరించుకుని ఆయన అభిమానులు పెద్ద ఎత్తున వేడుకలు నిర్వహిస్తున్నారు. మహేష్ బాబు కెరీర్‌లో మైలురాళ్లుగా నిలిచిన కొన్ని చిత్రాలను థియేటర్లలో రీ-రిలీజ్ చేస్తూ తమ ఆరాధ్య నటుడి పట్ల అభిమానాన్ని చాటుకుంటున్నారు. ఈ ఉత్సాహపూరిత వాతావరణంలో, అందరి దృష్టి ఇప్పుడు దర్శకధీరుడు రాజమౌళి దర్శకత్వంలో రూపొందుతున్న ఎస్‌ఎస్‌ఎంబీ 29 సినిమా అప్‌డేట్‌పైనే ఉంది. ఈ పుట్టినరోజున ఏదైనా ప్రత్యేక సమాచారం వస్తుందేమోనని అభిమానులు ఆసక్తిగా ఎదురుచూశారు. ఆ అంచనాలకు తగ్గట్టుగానే, రాజమౌళి అభిమానులకు ఒక ఊహించని సర్ప్రైజ్ ఇచ్చారు.

రాజమౌళి తన ఎక్స్ ఖాతా ద్వారా ఒక నోట్‌ను షేర్ చేస్తూ, ఎస్‌ఎస్‌ఎంబీ 29 గురించి కొన్ని కీలక విషయాలను వెల్లడించారు. “ప్రపంచ సినీ ప్రేమికులారా, మహేష్ అభిమానులారా… ఎస్‌ఎస్‌ఎంబీ 29 షూటింగ్ ఎప్పుడో ప్రారంభమైంది. మీ ఆసక్తిని మేము అభినందిస్తున్నాము. అయితే ఈ సినిమా కథ, దాని పరిధి చాలా విస్తృతమైనది. కేవలం ఫోటోలు, ప్రెస్ మీట్లతో ఈ ప్రాజెక్ట్‌ను వివరించలేము. మహేష్ బాబుతో నేను సృష్టిస్తున్న ప్రపంచం గురించి తెలుసుకోవడానికి అవి సరిపోవు. మీకు ఒక అద్భుతమైన అనుభూతిని అందించడానికి మేము కృషి చేస్తున్నాము. నవంబర్ 2025లో ఎప్పుడూ చూడని విధంగా ఒక భారీ అప్‌డేట్‌తో వస్తాను. మీ సహనానికి ధన్యవాదాలు” అని ఆయన పేర్కొన్నారు.

SSMB 29 : మహేష్ బాబు ఫస్ట్ లుక్ పోస్టర్‌ విడుదల..

ఈ నోట్‌తో పాటు రాజమౌళి మహేష్ బాబు ఫస్ట్ లుక్ పోస్టర్‌ను విడుదల చేశారు. ఇందులో మహేష్ బాబు ముఖం కనిపించకుండా, డీప్ V నెక్ షర్ట్ ధరించి ఉన్నారు. ఈ పోస్టర్లో మెడలో పూసలతో తయారైన దండ, అందులో నంది, ఢమరుకం, త్రిశూలం, శివుని నామాలు వంటి మహాదేవునికి సంబంధించిన చిహ్నాలతో అద్భుతంగా డిజైన్ చేసిన లాకెట్ ప్రత్యేక ఆకర్షణగా నిలిచింది. ఈ పోస్టర్ విడుదలైన వెంటనే సినిమాపై ఉన్న అంచనాలు మరింత పెరిగిపోయాయి. ఫస్ట్ లుక్‌లో ఉన్న మహాదేవుని చిహ్నాలు, ఈ చిత్రం హిందూ పురాణాలతో సంబంధం కలిగి ఉంటుందని లేదా కథలో ఆధ్యాత్మిక అంశాలు ఉంటాయని అభిమానులు, విశ్లేషకులు భావిస్తున్నారు. ఆఫ్రికన్ అడ్వెంచర్ యాక్షన్ జానర్‌లో రూపొందుతున్న ఈ చిత్రం కోసం మహేష్ అభిమానులు ఆసక్తిగా ఎదురుచూస్తున్నారు.