Panipuri: ఇటీవల కాలంలో పానీపూరి తినే వారి సంఖ్య ఎక్కువ అయ్యింది. సాయంత్రమైతే చాలు వీధి చివర బండ్లపై పానీ పూరి తినడానికి చాలామంది ఆసక్తి చూపుతుంటారు అయితే పానీ పూరి రుచి పరంగా బాగున్నప్పటికీ ఇది ఎన్నో రకాల అనారోగ్య సమస్యలకు కారణమవుతుంది అనే విషయం అందరికీ తెలిసిందే అయినప్పటికీ పానీపూరి తినడానికి ఎంతో మంది ఇష్టపడుతూ ఉంటారు. ఇలా పానీపూరి ఇష్టంగా తిన్నప్పటికీ కొంతమంది మాత్రం పూర్తిగా పానీపూరికి దూరంగా ఉండాలని నిపుణులు చెబుతున్నారు. మరి పానీ పూరి ఎవరు తినకూడదు ఎందుకు తినకూడదు అనే విషయానికి వస్తే

హై బీపీతో బాధపడేవారు పానీపూరికి పూర్తిగా దూరంగా ఉండాలి. ఆ కారం నీళ్లలో ఉప్పు (సోడియం) శాతం చాలా ఎక్కువగా ఉంటుంది. ఇది రక్తనాళాలపై విపరీతమైన ఒత్తిడిని పెంచుతుంది తద్వారా బీపీ మరింత ఎక్కువ కావడంతో గుండె పని తీరుపై ప్రభావం చూపే అవకాశాలు ఉంటాయి కనుక హై బీపీతో ఉండేవారు పానీ పూరి తినకపోవడం మంచిది.పానీపూరి పూరీలను ఒకే నూనెలో మళ్లీ మళ్లీ డీప్ ఫ్రై చేస్తారు. దీనివల్ల అందులో ప్రమాదకరమైన ట్రాన్స్ ఫ్యాట్స్ తయారవుతాయి. ఇప్పటికే గుండె జబ్బులు, అధిక కొలెస్ట్రాల్ ఉన్నవారు వీటిని తినకపోవడం మంచిది.

Panipuri: జీర్ణకోశ సమస్యలు ఉన్నవారు..

పానీపూరి తయారీలో వాడే మైదా, ఆలుగడ్డలో కార్బోహైడ్రేట్లు ఎక్కువగా ఉండి, శరీరానికి మేలు చేసే పోషకాలు, ఫైబర్ చాలా తక్కువగా ఉంటాయి. డయాబెటిస్ ఉన్నవారు ఇవి తిన్న వెంటనే రక్తంలో చక్కెర స్థాయిలు వేగంగా పెరుగుతాయి. ఇక శరీర బరువు పెరిగి ఉబకాయానికి కూడా కారణమవుతాయి. పానీపూరిలో వాడే అధిక మసాలాలు కారణంగా తీవ్రమైన గ్యాస్ట్రిక్ సమస్యలు కూడా వస్తాయి. అందుకే గ్యాస్ట్రిక్ సమస్యలతో బాధపడేవారు, అల్సర్లు, యాసిడ్ రిఫ్లక్స్ లాంటి జీర్ణకోశ సమస్యలు ఉన్నవారు వీటిని తింటే పరిస్థితి మరింత విషమంగా మారుతుంది. ఇలా ఈ విధమైనటువంటి సమస్యలు ఉన్నవారు పానీపూరీలకు దూరంగా ఉండడం మంచిదని ఆరోగ్య నిపుణులు సూచిస్తున్నారు.