Politics: ఒక వ్యక్తి దగ్గర ఆదాయానికి మించి ఆస్తులు ఉన్నట్లు గుర్తించిన, అలాగే ఇల్లీగల్ వ్యవహారాలతో ధనార్జన చేస్తున్నారని తెలిసినా, ఎవరో ఒకరి ఫిర్యాదు ఆధారంగా పక్కా సాక్ష్యాలతో ఐటీ దాడులు చేయడం జరుగుతుంది. అయితే ఈ మధ్యకాలంలో ఈ ఐటీ దాడులు అనేవి అధికార పార్టీ ప్రత్యర్థులపై ప్రయోగించి రాజకీయ అస్త్రాలుగా మారిపోయాయి. ముఖ్యంగా బీజేపీ కేంద్రంలో అధికారంలోకి వచ్చిన తర్వాత తమ ప్రత్యర్థులపై ఎక్కువగా ఐటీ దాడులు చేయిస్తూ భయపెట్టి తమదారిలోకి తెచ్చుకుంటున్నారు అనే విమర్శలు రాజకీయ వర్గాలలో వినిపిస్తున్నాయి. ఇక ఈ ఆరోపణలకి బలం చేకూరే విధంగా కేంద్రం ఆధీనంలో ఉన్న ఇన్కమ్ ట్యాక్స్ అధికారులు ముఖ్యంగా బీజేపీకి ప్రత్యర్ధులుగా ఉన్న పార్టీలలోని నాయకుల మీదనే దాడులు చేస్తూ ఉంటారు. వారి దగ్గర ట్యాక్స్ లెక్కల్లో లేని ఆస్తులు ఉన్ననాయని చూపించే ప్రయత్నం చేస్తూ ఉంటారు.

ఇప్పటికే చాలా రాష్ట్రాలలో ఈ ఐటీ రైడ్స్ రాజకీయాలలో సంచలనంగా మారాయి. ఇప్పుడు బీజేపీలో వచ్చే ఎన్నికలలో తెలంగాణలో అధికారంలోకి రావాలని విశ్వ ప్రయత్నాలు చేస్తుంది. ఈ నేపధ్యంలో తెలంగాణ రాష్ట్రంలో అధికారంలో ఉన్న టీఆర్ఎస్ పార్టీ నేతలపై తమ రాజకీయ అస్త్రాలని ప్రయోగిస్తోంది. డబ్బు, పదవులు అని ముందుగా ఆశ చూపించే ప్రయత్నం చేస్తుంది. వాటికి లొంగకపోతే ఇక ఐటీ దాడులతో భయపెడుతుంది. మునుగోడు ఎన్నికల ముందు బీజేపీ పార్టీ ఎమ్మెల్యేల కొనుగోళ్లకి తెరతీసింది అంటూ కేసీఆర్ ఆధారాలతో సహా చూపించాడు. గతంలో ఎమ్మెల్సీ కొనుగోళ్ల వ్యవహారంలో చంద్రబాబుని ఇరుకున పెట్టి తెలంగాణ వదిలి ఏపీలోకి వెళ్లిపోయేలా కేసీఆర్ చేయగలిగారు. దానిని పకడ్బందీగా అమలు చేసి చంద్రబాబుని తెలంగాణ నుంచి సాగనంపడంతో పాటు ఆ పార్టీ నాయకులని టీఆర్ఎస్ లో కలిపేసుకున్నారు.

ఇక అలాంటి అస్త్రమే తెలంగాణ పోలీసులతో కలిపి వ్యూహాత్మకంగా అమలు చేసి బీజేపీ కొనుగోళ్ల పర్వాన్ని బహిర్గతం చేశారు. ఆ ప్రభావం మునుగోడు ఎన్నికల ఫలితాలు తారుమారు అవ్వడానికి కూడా కారణం అయ్యిందనే టాక్ ఉంది. అయితే టీఆర్ఎస్ వేసిన రాజకీయ ఎత్తుగడకి ప్రతిగా బీజేపీ పార్టీ ఐటీ రైడ్స్ అస్త్రాన్ని వాడుకుంటుంది. క్రమం తప్పకుండా టీఆర్ఎస్ పార్టీకి చెందిన బడా వ్యాపారవేత్తలు లక్ష్యంగా జరుగుతున్నా ఐటీ దాడులు ఇప్పుడు తెలంగాణలో రాజకీయాలలో సంచలనంగా మారాయి. తాజాగా ఎంపీ మల్లారెడ్డిపైన ఐటీ రైడ్స్ జరిగాయి. అలాగే ఆ పార్టీకి ఫైనాన్షియల్ గా సపోర్ట్ గా ఉన్న బలమైన నాయకులని లక్ష్యంగా చేసుకొని ఈ ఐటీ దాడులు జరుగుతూ ఉండటంతో ఇవన్నీ బీజేపీ రోడ్ మ్యాప్ లో భాగమే అనే మాట బలంగా రాజకీయ వర్గాలలో వినిపిస్తుంది. ఇక బీజేపీ ఈ ఐటీ రైడ్స్ అనే రాజకీయ అస్త్రంపై కేసీఆర్ ఏ విధమైన అస్త్రాలతో ఎదురుదాడి చేస్తాడు అనేది ఇప్పుడు ఆసక్తికరంగా మారింది.