Surya – Jai bheem : ‘జై భీమ్’ తో అద్భుతమైన విజయం అందుకున్న సూర్య..కథ బావుండాలే గానీ ఓటీటీ అయితే ఏంటీ అంటున్న ఫ్యాన్స్..

Surya – Jai bheem : కోలీవుడ్ స్టార్ హీరో సూర్య మరో అద్భుతమైన విజయాన్ని అందుకున్నారు. అంతకముందు వరుసగా ఆయన నటించిన సినిమాలు బాక్సాఫీస్ వద్ద యావరేజ్ టాక్ వరకే సరిపెట్టుకున్నాయి. విజయ్, అజిత్, కార్తి, ధనుష్ లాంటి యంగ్ హీరోలు వరుసగా బ్లాక్ బస్టర్స్ అందుకుంటున్న సమయంలో సూర్య మాత్రం హిట్ కోసం తపించారు. ఎట్టకేలకి లేడీ డైరెక్టర్ సుధ కొంగర దర్శకత్వంలో నటించిన సూరారై పోట్రు సినిమాతో ఊహించని సక్సెస్ అందుకున్నారు. ఇదే సినిమా తెలుగులో ఆకాశం నీ హద్దురా అనే టైటిల్‌తో వచ్చి తెలుగు ప్రేక్షకులను బాగా ఆకట్టుకుంది.

కరోనా వేవ్స్ కారణంగా ఓటీటీ వేదికపై రిలీజై భారీ విజయాన్ని అందుకుంది. ఎయిర్ డెక్కన్ వ్యవస్థాపకుడు కెప్టెన్ గోపీనాథ్ జీవితం ఆధారంగా ఈ సినిమాను రూపొందించారు. గత కొంతకాలంగా వెండితెరపై బయోపిక్స్ బాగా ఆదరణను పొందుతున్నాయి. ఈ క్రమంలో వచ్చిన ఆకాశం నీ హద్దూరా కూడా విమర్శకుల ప్రశంసలు అందుకుంది. మూడు నాలుగేళ్ళుగా భారీ హిట్ కోసం ఎదురు చూసిన సూర్య మంచి హిట్ అందుకున్నారు. కథ బావుండాలే గానీ థియేటర్స్‌లో కాకుండా ఓటీటీ వేదిక ద్వారా రిలీజ్ చేసినా ప్రేక్షకులు ఆదరిస్తారనే దానికి ఈ సినిమా ఓ ఉదాహరణ.

Surya – Jai bheem: ఓటీటీలో రిలీజ్ చేసి హిట్ సాధించడం ఇక్కడ గొప్ప విషయంగా చెప్పుకోవాలి.

ఇక ఈ క్రమంలో సూర్య తాజా చిత్రం ‘జై భీమ్’ వచ్చింది. ఈ సినిమాను ప్రముఖ ఓటీటీ అమెజాన్ ప్రైమ్ ద్వారా ప్రేక్షకుల ముందుకు తీసుకు వచ్చారు. 1995లో జరిగిన యదార్ధ ఘటన ఆధారంగా ‘జై భీమ్’ చిత్రం రూపొందగా, ఇందులో సూర్య లాయర్‌గా నటించారు. అన్యాయం జరిగిన ఓ గిరిజన మహిళకు న్యాయం జరిగేలా చేసిన ప్రధాన అంశం ప్రేక్షకులను బాగా ఆకట్టుకుంది. కథ, కథనాలలో సహజత్వం ఉండటం సినిమా సూపర్ హిట్ అయ్యేందుకు ముఖ్య కారణాలు అయ్యాయి. ఓ మంచి సినిమా ప్రేక్షకులకి చేరాలంటే థియేటర్స్‌లో మాత్రమే రిలీజ్ చేయాలి అనేదానికి బిన్నంగా ఓటీటీలో రిలీజ్ చేసి హిట్ సాధించడం ఇక్కడ గొప్ప విషయంగా చెప్పుకోవాలి. మొత్తానికి సూర్య మరో అద్భుతమైన విజయాన్ని తన ఖాతాలో వేసుకున్నారు. ఈ మూవీకి టి.జె. జ్ఞానవేల్ దర్శకత్వం వహించగా, సొంత నిర్మాణ సంస్థలో సూర్య – జ్యోతిక నిర్మించారు.