Ram Charan-Upasana: రామ్ చరణ్, ఉపాసనలకు ట్విన్స్ పుట్టారు. ఈ విషయాన్ని మెగాస్టార్ చిరంజీవి సోషల్ మీడియా ద్వారా కన్‌ఫర్మ్ చేశారు. మెగా ఫ్యామిలీ సంబరాల్లో మునిగితేలుతోంది. మెగాస్టార్ చిరంజీవి తనయుడు రామ్ చరణ్ ఆయన భార్య ఉపాసనలకు కవల పిల్లలు జన్మించారు. ఈ శనివారం (జనవరి 31) హైదరాబాద్ అపోలో ఆసుపత్రిలో ఉపాసన ఇద్దరు బిడ్డలకి జన్మనిచ్చింది. ఈ ట్విన్స్ లో ఒక పాప, ఒక బాబు ఉన్నారు. ఈ విషయాన్ని అధికారికంగా చిరంజీవి తన సోషల్ మీడియా హ్యాండిల్ ఎక్స్(X) ద్వారా తెలిపారు.

ఈ మేరకు చిరు.. “ఎంతో సంతోషంతో, కృతజ్ఞతతో ఈ విషయాన్ని మీతో పంచుకుంటున్నాము. రామ్ చరణ్, ఉపాసనలకు ట్విన్స్ (ఒక బాబు, ఒక పాప) పుట్టారు” అని వెల్లడించారు. అంతేకాదు, తల్లీబిడ్డలిద్దరూ ఆరోగ్యంగా ఉన్నారు, ప్రస్తుతం అంతా క్షేమమేనంటూ పోస్ట్‌లో రాసుకొచ్చారు.
తాతయ్య, నానమ్మలుగా ఈ చిన్నారులను మా కుటుంబంలోకి ఆహ్వానించడం మాకు ఎంతో ఆనందాన్ని ఇస్తోందని, ఇదొక దైవాశీర్వాదమని చిరంజీవి ఈ సందర్భంగా ఎంతో ఎమోషనల్ అయ్యారు. ఇక, మా కుటుంబంపై ప్రేమను కురిపిస్తూ, ఆశీర్వదించిన ప్రతి ఒక్కరికీ హృదయపూర్వకంగా ధన్యవాదాలు..అని చిరంజీవి తెలిపారు.

Ram Charan-Upasana: రామ్ చరణ్, ఉపాసనలకు కవలలు

మొత్తానికి, రామ్ చరణ్, ఉపాసనలకు కవలలు పుట్టడంతో మెగా ఫ్యామిలీతో పాటు అభిమానుల్లోనూ ఆనందకరమైన వాతావరణం నెలకొంది. ప్రస్తుతం సోషల్ మీడియా మొత్తం ఈ వార్త చక్కర్లు కొడుతూ వైరల్ అవుతోంది. ఇంతకముందు రామ్ చరణ్, ఉపాసనలకు ఒక పాప పుట్టిన సంగతి తెలిసిందే. ‘క్లిన్ కారా’ అనే పేరు పెట్టారు. ఇప్పుడు ఈ దంపతులు మరో ఇద్దరు బిడ్డలకి తల్లితండ్రులవడం విశేషం. ఇక, రామ్ చరణ్ సినిమాల విషయానికొస్తే, బుచ్చిబాబు సానా దర్శకత్వంలో ‘పెద్ది’ అనే పాన్ ఇండియా చిత్రాన్ని చేస్తున్నాడు. 2026, మార్చి 27న ఈ మూవీ రిలీజ్ కానుంది.

మెగాస్టార్ చిరంజీవి ఈ సంక్రాంతికి ‘మన శంకరవరప్రసాద్‌గారు’ సినిమాతో వచ్చి భారీ హిట్ అందుకున్నారు. 2026 ప్రారంభంలో అనిల్ రావిపూడి రూపొందించిన ఈ మూవీతో సాలీడ్ హిట్ కొట్టిన మెగాస్టార్..కూతురు సుష్మితకి నిర్మాతగా మంచి హిట్ ఇచ్చారు. ఇప్పుడు మెగా ఫ్యామిలీలో చరణ్, ఉపాసన దంపతులు ఇద్దరు బిడ్డలకి జన్మనివ్వడంతో పండుగ వాతావరణం నెలకొంది. మొత్తానికి, 2026 మెగా ఫ్యామిలీకి మంచి శుభారంభం అని చెప్పాలి.